გამარჯობა,
მე ვარ ნიკოლოზ გამყრელიძე, ონის მუნიციპალიტეტიდან, პროფესიით ეკონომისტი, თუმცა ამ ეტაპზე სულ სხვა მიზნები და იდეები მაქვს, რომლებიც რა თქმა უნდა რაჭას უკავშირდება და რომლებიც შეიძლება ცოტათი ორიგინალურადაც ჩაითვალოს. სანამ ჩემს საქმიანობაზე გადავალ მანამდე გეტყვით რომ მე საქართველოში არ ვცხოვრობდი, გერმანიაში ვიყავი არც თუ ისე მცირე პერიოდი და საბოლოოდ გადავწყვიტე უცხო და თან წარმატებულ ქვეყანაში დაგროვებული ჩემი მცირედი გამოცდილება საკუთარ სამშობლოს მოვახმარო.
დაბრუნების შემდეგ ჩემი მთავარი მიზანი იყო რომ შემექმნა ორიგინალური სერვისი ან შეთავაზება, რომელიც ზუსტად იქნებოდა მორგებული ჩვენს რეგიონზე და ამავდროულად ხელს შეიწყობდა ტურიზმის განვითარებას. ვიტყვი რომ გამიმართლა და ამ ძიების პროცესში წავაწყდი ევროკავშირის, შვედეთის და ავსტრიის ერთობლივი ხელშეწყობით დაფინანსებული პროექტ GRETA-ს. აქვე უნდა აღვნიშნო რომ ეს ხდებოდა პანდემიის დროს, რომლის დროსაც ალბათ ბევრი ადამიანი იყო ცხოვრების და საქმიანობის განსხვავებულად გაგრძელების ძიების პროცესში ჩართული. მე დღემდე ვთვლი რომ ასეთ დროს მსგავსი პროექტის გამოჩენა მართლაც უდიდესი შესაძლებლობა იყო.
ვინაიდან გრეტა სამთო ტურიზმის განვითარებას მოიცავდა, ვიფიქრე საოჯახო სასტუმროს აშენება მამა-პაპისეულ მიწაზე, მაგრამ საინფორმაციო შეხვედრაზე როდესაც გაირკვა რომ მშენებლობის დაფინანსება არ მოიცავდა პროექტის პირობებს, გადავწყვიტე განსხვავებული და რეგიონზე მორგებული იდეა მომეფიქრებინა. ასე მივედი ველოსიპედების გაქირავების სერვისის იდეამდე, რომელიც როგორც სამთო ტურიზმის ასევე ეკოლოგიური კუთხით ზუსტად ემთხვეოდა საგრანტო პროგრამას.
როგორც ჩანს იდეა საინტერესო აღმოჩნდა და გავიმარჯვე, 80 პროცენტიანი თანადაფინანსებით შევიძინე როგორც სამთო, ასევე ელექტრო ველოსიპედები. ელექტრო ველოსიპედებზე მოთხოვნა სულ უფრო და უფრო იზრდება მსოფლიო ტურიზმში და ვფიქრობ ჩვენთანაც ნელ-ნელა მოიკიდებს ფეხს. ზოგადად წელს პირველი წელია რაც ჩემი იდეა განხორციელდა და რაიმე კონკრეტულის თქმა მიჭირს გარდა ერთისა: ამ ერთი შეხედვით მცირედმა დახმარებამ უდიდესი სტიმული მომცა.
რადგან დახმარება ვახსენე უნდა გავიხსენო ჩატარებული ტრენინგები, რაც დამეხმარა საქმის სწორად დაგეგმვასა და აღსრულებაში. დონორების დაფინანსებით განხორციელებული ჩემი იდეა გახდა მოტივატორი შემდგომ გეგმებზე სამუშაოდ. ასევე მინდა ვთქვა რომ უცხოურ საგრანტო პროგრამებთან მუშაობის გამოცდილება მივიღე, რაც აუცილებლად დამეხმარება ჩემი მთავარი იდეის, საოჯახო სასტუმროს სისრულეში მოყვანის პროცესში.
დასასრულს მინდა ვუთხრა სხვა დამწყებ მეწარმეებს რომ აუცილებლად ცადონ და დაიწყონ საკუთარი იდეების განხორციელება, მითუმეტეს თუ რაჭაში აპირებენ ამას, რადგან ეს ისეთი ადგილია მცირე მონდომების შემთხვევაშიც კი ყველაფერი გამოდის. ამასთანავე რეგიონში ყველა წამოწყება ერთმანეთს ეხმარება და აძლიერებს ამიტომ ერთიანობით უფრო მეტად გავძლიერებთ ჩვენს რეგიონსაც და ერთმანეთსაც.
საინტერესო იდეებისთვის და ახალ პროექტებთან სათანამშრომლოდ რასაკვირველია მზად ვარ და დაინტერესების შემთხვევაში, ვიდრე საიტი მზადების პროცესშია, დაკავშირება შესაძლებელია ელ-ფოსტის: nikolos10@hotmail.com და ტელეფონის: 558551613 საშუალებით.
---
ევროკავშირის, შვედეთის და ავსტრიის მხარდაჭერით საქართველოს მაღალმთიან რეგიონში, მცირე და საშუალო მეწარმეები, რომლებმაც მიიღეს მნიშვნელოვანი მხარდაჭერა ბიზნესის განვითარებისთვის, ჯამში 68 მეწარმეს ითვლის.
თვალი ადევნეთ წარმატების შემდეგ ისტორიებს, სადაც საოცრად საინტერესო ხალხი გვიამბობს საკუთარ გამოცდილებებზე.
პროექტი GRETA | „მწვანე ეკონომიკა: მდგრადი სამთო ტურიზმი და ორგანული სოფლის მეურნეობა“ ევროკავშირის, ავსტრიისა და შვედეთის მხარდაჭერით, საქართველოში ავსტრიის განვითარების სააგენტო ახორციელებს. პროექტი მიზნად ისახავს ბიზნეს-გარემოს გაუმჯობესების ხელშეწყობას და დამატებითი შემოსავლის შექმნის შესაძლებლობის გაზრდას საქართველოს ეკონომიკის ორ ისეთ მნიშვნელოვან სექტორში, როგორიცაა სამთო ტურიზმი და ორგანული სოფლის მეურნეობა.
ეს მასალა მომზადებულია ევროკავშირის, შვედეთის და ავსტრიის თანადაფინანსებით, პროექტ GRETA-ს ფარგლებში. მის შინაარსზე სრულად პასუხისმგებელია ავსტრიის განვითარების სააგენტო/პროექტი GRETA და შესაძლოა, რომ იგი არ გამოხატავდეს ევროკავშირის, შვედეთის და ავსტრიის შეხედულებებს.
#68წარმატებისისტორია
#ევროკავშირი #შვედეთი #ავსტრია
#პროექტიGRETA #მთისეკონომიკისგანვითარებისთვის